ලිං කටෙං වැටුන එකා 50
"අද දවසටම නංගී දැක්කෙ නෑ සපූ.."
"එයා ඉස්කෝලෙට ආවදා ඉඳලම මං දැක්කෙ නෑනෙ."
"හොස්ටල් එක ඉස්සරහත් ඔය ඉන්නේ වෙලාවකට.... ආ... අර ඉන්නේ.. අර ඉන්නේ සපු. අර ලා කොලපාට ගවුම ඇඳලා."
"බෑ මට එහෙම අඳුරංට බෑ දයා... දවසයිද දෙකයිදනෙ දැක්කේ. දැං මූණුවරත් වෙනස් ඇති."
"ඒක ඇත්ත සපූ.. සමහර විට ඉස්කෝලෙදි ලඟින්ම පාස් වෙලත් ඇති. ලමයි ගොඩක් එකටම දැක්කමත් වෙනම අඳුරන්ට අමාරුයි. අනික මේ වයසේදී ටක් ටක් ගාල වෙනස් වෙල හැදෙන්නේ."
"ඔව් දයා, ජිනත් දැං කම්මුල් එහෙම පිරිල... වෙනස් වෙල තමයි."
අලුත් වාරේ පටංගෙන සතියක් විතර යනකොට සිස්සත්වේ පාස් වෙච්ච අලුත් ළමයි ඉස්කෝලෙටයි හොස්ටල් වලටයි එංට පටං ගත්තේ. මාදි නංගිත් ආවා කියල දවසක් දයා කිව්වා. එදා දයාගෙ අම්මලාවත් මං දැක්කෙ නෑ. ඉස්කෝලේ වෙලාවේ ඇවිත් තිබුනේ. හැබැයි දයාට ගෙනාව කැවුම් නං මටත් එක්කයි තිබුනේ. මාධංගනී නංගී බලංට හිතට දැනුන වුවමනාව මං හිතාමතාමයි පෙන්නුවේ නැත්තේ. දයත් ඒ ගැන වැඩිය පන්න පන්න කතා කෙරුවේ නෑ.
ලතා බොහොම ආදරයෙං මාදි නංගී බලාගෙන තිබුනා. ඒ ගැන නංගී දයාටත් කියල. අනික් ලමයිංට රැග් කරනකොට මෙයා බේරිල. ඒ වුනාට පොඩි පොඩි ගෝරි තිබිල. එක ලමයෙක් දයා ගැන කියවල.....
"මේ.. දන්නවද... උඹගෙ අයියා තමයි මගෙ වස්තුව. මගෙ කුලුඳුල් පෙම්වතා. අපි දෙන්නට දෙන්නා හදවත පතුලෙන්ම අදරෙයි. මගෙ දයා මට කියලා තියෙන්නේ මාව ලැබුනේ නැත්තං ... ඉතිරි හරිය දැන ගංට ඕනද?"
"මෙහ්... මාධංගනීට නෙවේ මට නම් දැන ගන්ට ඕනා."
"අපෝ ඕක හිතා ගන්ට බැරිද බං... එයා මට කියලා තියෙන්නේ එයාගෙ ආදරේ අකලංකයි, නොඉඳුල්, සදාකාලිකයි, ආත්ම ගණනක් තිස්සේ පතාගෙන ආව බැඳීමක් කියලා. ඊයෙත් ලියුමක් දුන්නා. මං ගේංටද ඒක.? ඉතිං මාව නොලැබුනොත්... මට කියලා තියෙන්නේ... උඹ මගෙ නැන්දම්මට එහෙම කියන්නෙ නෑ ඔන්න... මට කියලා තියෙන්නේ.... එක්කෝ දැන්ම උඹ දැන ගන්ට ඕන නෑ... මයෙ නෑනා පොඩ්ඩ.."
"ඒයි.. අර උඹට සින්දුවක් කිව්වා කිව්වේ.. ඒකත් කියපං."
"එකක් නෙවෙයි බං... දෙක තුනක්ම කිව්වා. පුදුම ලස්සනට එයාට සින්දු කියන්ට පුලුවන්නෙ. ඔන්න ඉස්සර වෙල කිව්වේ... අර 'මල් කුමරියො සිටියත් කොතරම් කැලේ.. ඒ සැවොම පරාදයි පැහැයට ඔබෙ තොලේ...' කියල පදයක් තියෙන සින්දුව. ඊට පස්සේ කිව්වා... "
"මේ .. හැබැයි තාලෙට සින්දුව ඔක්කොම කියපං ඒකවත්.."
"හරි හරී... නෑනා ඉස්සරහ ශිල්ප දක්වන්නේ නැතිව මං කාට පෙන්නන්ටද?"
"මම ඩොල්කිය.. ජින උටු තක... ජින උටු තක... ජින... ඉතිං පටං ගනිං..."
"දුටු දා ඉඳලා ලුහු බැන්දා.... දන්නවාද මම පෙම් බැන්දා............... ඔන්න දැක්කද උඹගෙ අයියා පොඩ්ඩගෙ රඟේ..!"
"හරි හරී.. දැන්වත් කියපන්කො උඹව ලැබුනෙ නැත්තං දයා මොනවද කරනවා කිව්වේ..?"
"ඒක බොහොම බරපතල දෙයක්. ඒක මාධංගනී දැන ගංට ඕන නෑ. කෙල්ල පව්නෙ. වරෙං උඹට මම හොරෙන් කියන්නං..." රහසෙන් වාගේ ජන්ක්ෂන් එකටත් ඇහෙන්ට හයියෙන් මෙහෙම කියලා..
"මාව ලැබුනෙ නැත්තං එයා... වෙන කෙල්ලෙක් මැරි කරනවලු!"
simple "s"
2019.09.24
පින්තූරය අන්තර්ජාලය ඇසුරෙන්.
