උඩගෙදර කතා 69 (මයිනා)

උසාවියක් පැත්තෙන් මෙහෙම ඇහුනලු.. 03

"මයිනා..  "

                   ඉස්සර. එක්තරා මිනිසෙකුට "මයිනා" කීවම තරහ යනවා. උන්හිටි තැන් අමතක වෙන තරමට. දවසක් කෙනෙක් මෙයාට මයිනා කියනවා. මයිනා එයාට බනිනවා. මෝටර් පදයත් සඳහන් කරලම. අනික් එක්කෙනා මෙයාව තව තරහ ගන්නන්න අයෙත් මයිනා කියනවා. මයිනා එයාට ගහනවා. තව සැරයක්  පුද්ගලයින් ලියාපදිංචි කරන තැනට යන්න වෙන තරමට. නඩුවකුත් ගොනු වෙනවා.
"යුෂ්මතා මේ පැමිණිලිකරුට පහරදී තුවාල සිදු කළාද?"
"එහෙමයි ස්වාමීනි.. මම ගැහුවා."
"ඇයි එහෙම කළේ..?"
"ස්වාමීනි...එයා මට මයිනා කිව්වා.. ඒකයි."
"ඉතින් යුෂ්මතාට මයිනා කීවාම..." විනිසුරුවරයාට තව වචනයක්වත් කියන්න ලැබෙන්නේ නෑ..
"ඔන්න ඔන්න ඉතිං නඩුකාර හාමුදුරුවන්නෙත් අම්.. "
"මම විත්තිකරු නිදහස් කරනවා... " විනිසුරු තුමා නියෝග කරනවා...!
                                                                
                                                                  "s"

උඩගෙදර කතා 68 (ෂ්... ෂ්...)

උසාවියක් පැත්තෙන් මෙහෙම ඇහුනලු ... 02

"ෂ්...ෂ්..."
***************
නීතිඥ කාර්‍යාලය:

"මොන විදියකටවත් තමාව නීති තර්කයකින් නම් බේරා ගන්න බෑ. මොකක් හරි සහනයක් ඉල්ලා ගන්න බලමු. හැබැයි මම කියන විදියට උසාවියේදී හැසිරෙන්න ඕන. තේරුනා නේද සාමරත්න?"
"ඔව් මහත්තයෝ.."

                        *                      *                     *

උසාවිය:

"යුෂ්මතා මේ පැමිණිලි කාරයට පහර දුන් බව පිළිගන්නවද?"
"ෂ්.. ෂ්.."
"යුෂ්මතා මේ පැමිණිළිකාරයට පහර දුන්නේ ඇයි?"
"ෂ්.. ෂ්.."
"පැමිණිලි කාරයත් තමාට පහර දුන්නද?"
"ෂ්.. ෂ්.."
"පැමිණිලිකාරයා බැන්නද?'
"ෂ්.. ෂ්.."
"මට යුෂ්මතාව හිරගෙට නියම කරන්න සිද්ද වෙනව."
"ෂ්.. ෂ්.."
"මේ විත්තිකරු මානසික රෝගයකින් පෙලෙනවා වගෙයි.."
"ෂ්..ෂ්.."
"විත්තිකරු නිදහස් කරන ලෙස මම නියම කරනවා."
"ෂ්.. ෂ්.."
                       *                     *                    *
නීතිඥ කාර්‍යාලය:

"සාමරත්න බොහොම දක්ෂ විදියට රඟ පෑවනෙ.."
"ෂ්.."
"මගෙ ගාස්තුව දෙදාස් පන්සීයයි.. සාමරත්න."
"ෂ්.. ෂ්.."
"සාමරත්න මගෙ ගාස්තුව දෙදාස්..."
"ෂ්.. ෂ්..
"යකො මගෙ ෂ් මටම ෂ්! නෙ! "
                         
                                                           "s"
2018.11.08

                 

උඩගෙදර කතා 80 (පොරව)

                                     "පොරව ....."

                මං බස් හෝල්ට් එකට එන විට අපේ ගමට යන නවයයි කාලේ බස් එක ගොසින් ය.. කාලේ කාලේ වැඩක්, බස් එක නතර කළ විගස කළ යුතු නිසා දවල් කාලේ මෙන් නොව, අපේ මෙම දහයේ අන්තිම බස් එක නම්, ඉස්සර කාලේ පමණක් නොව දැන් කාලේ ද, කාලේ අයියා හරියටම වෙලාවට ගේනවා ම ය.

                              *                 *                 *

              බස් හෝල්ට් එකේ ගැටව් හතර පස් දෙනෙක් හරිම විනෝදෙන් කතාවක.. ටිකක් අඳුර හින්දම නෙවේ.. ඒ ඔක්කොම ගැටව්ද කියලා අඳුර ගන්නත් විනාඩියක් දෙකක් ගියා.. කොණ්ඩා හා කන් මද අඳුරේ වුනත් පෙනුන හින්දා..! ඒ කතාවට එහෙමත් නැත්නම් චැට් එකට මට කන් දෙන්න ලැබුනේ අවසන් කොටසේදී කියලා මට තේරුනා. මේක මං ඇහුවද ඇහුනද මං දන්නෑ.. ඒක මහ ලොකු ප්‍රශ්නෙකුත් නෙවේ..

                             *                  *                   *

"ඌත් එක්ක හිටිය සම්පතාට මොකද වුනේ බං...?"
"අප්පා.. පොර දැන් හරි පොරක් බං.."
"ඒ කිව්වේ.."
"මටත් 'පොරව' අල්ලා ගන්නත් උවමනාවක් තියෙනවා බං.." තුන් වෙනියෙක් ද කතාවට එක් වී ය.
"මොන .. ! 'පොර'අල්ලන්න' දැං ලේසි නෑ ඩෝ.. බලන්න එපැයි.. කළු කෝට් බෑය 'පොරව ගෙන' උගෙ අර පුරුදු වෝක් පාර දාලා යනකොට.. නියම ජෙන්ටා මචාං.."
"මාත් දවසක් හොරෙං ගිහිං බලං හිටියා... අනිප්පැත්තේ එකෙක් එක්ක 'පොරට වැටුනොත්' සීලිම නෑ බං"
"ඌ දැං එතන හෙනට හිට් වෙලා මචං.."
"හොඳයි .. දෙයියනේ.. ඒ කාලේ ඉඳලම ඕකා හෙන මීටරේ නෙ.. "
"කොච්චර උඩට ගියත් මෑන් තවම අපි එක්ක බොක්කෙංම බං.."

                              *                   *                  *

               අපරාදේ මගෙ  බස් එක එනවා..
කමක් නෑ.. මුළු වටපුළුවටම ඇහෙන්න මිහිරි සිංඳුවකුත් දාගෙනනෙ..
"ඉඩං, කඩං, කාර්, බාර් අතරේ..
ලැබුනත් දෑවද්ද කෝටි හතරේ..
අපි හිටියත් තවමත් මේ පැදුරේ..
බොක්ක ඉන්නෙ තවමත් අපි අතරේ.."
"කැරකිල.. බිමට නැමිල... "
"බොක්ක ඉන්නෙ තවමත් අපි අතරේ..."
"ඩඩං ඩං... ඩඩං ඩං..."
".................................................. "

                                                    simple "s"
2017.12.07