උඩගෙදර කතා.... අංක 26
"කොට්ට කිරි බත්..."
"අප්පච්චි, කොට්ට කිරිබත් වලට ඉඹුල් කිරිබත් කියලත් කියනවලු.. "
"ඔව් මයෙ පුතා. මයෙ පුතා ඉඹුල් ගහක් දැකල තියෙනවද?"
"ඒක දකිංට අපායේ යංට වෙයි..! හා... අපි කවටයාමුණේ ගිය වෙලාවේ අඹපු එකක් නං දැක්කා."
අප්පච්චිටයි අපෙඅම්මටයි හොඳටම හිනා.
"ඒ මයෙ පුතා කටු ඉඹුල. අප්ප්ච්ච් අහන්නේ ඉඹුල් ගහ ගැන.. " අපෙ අම්මා කිව්වා.
"ඇයි අප්පච්චි ගිය අලුත් අවුරුද්දට තෙල් ගාංට ඉස උඩිං එල්ලංට ඒ කොල ගේංට අපි ගියේ උඩගැම්මැද්දේ.. එතකොට ඒ ගහක් දැක්කනෙ."
"ඔව්.. අර ලොකු රතුමල් බිම පුරා වැටිල තිබ්බේ. මයෙ පුතා ඒ මල් නං කොට්ට මල් වලට වෙනස්. ගෙදරත් ඇන්න ආවානේද ඒ මල්? ගහේ කඳ කොට්ට ගහට වැඩිය ලොකුයි, පාටත් යංතමට වෙනස්. ඒ කඳ පුරාම කොට්ට ගහේ වාගේ ලොකු කටු. කොලත් ටිකක් එක වාගේ. ඔය සමානකං හින්දයි කඳේ පෙනුම ටිකක් එක වාගේ හිංදයි සමහර පැතිවල කොට්ට ගහටත් ඉඹුල් ගහ කියන්වද දන්නෙ නෑ. කොට්ට ගහට පුලුං ගහ කියලත් කියනවා වාගේ. ඒ කිරිබත් කොට්ට ගෙඩිය වාගේ හිංදා කොට්ට කිරිබත් කියල නම හැදිල තියෙනවා.. ඒ පැතිවල ඉඹුල් ගහ කොට්ට ගහට සමාන හිංදා ඉඹුල් කිරි බත් කියනවා ඇති..."
මේ කොට්ට කිරිබත් කතාව ඇදිල ආවේ අපිට උදේට අපෙඅම්මා කොට්ට කිරිබත් හැදුව හිංදා. අපෙඅම්මා මට බෙදුවේ එකයි. අප්පච්චිට දෙකයි. තව ඕනෑ නං ගංට කියල අපිට කිව්වා. පොල්කොල පෙට්ටියේ තව තුන හතරක් තිබ්බා. ටිකක් වෙලා කනකල් හතරක් පහක් කංට පුලුවං වෙයි කියල හිතෙනවා. ඒ වුනාට එහෙම ගොඩක් කංට බෑ.
"ඉතිං අප්පච්චි... මේ පැණිපොල් වෙනමයි කිරිබත් වෙනමයි ගත්තා නං ඉවරයිනෙ. නිකං කිරිබතුයි ලුනුමිරිසුයි ගන්නවා වාගේ.."
"හොඳ එකක් ඇහැව්වේ.." අපෙඅම්මා කිව්වා.
"මයෙ පුතා අප්පච්චි හරි අම්මා හරි බත් කුරුල්ලෙක් කවනකොට නිකං බත් වලට වැඩිය රහයිද නැද්ද?"
"රහයි..."
"ආයෙ.... කිරිබත්, මං කියන්නේ නිකං කිරිබත්, හැන්දේ ගුලි කරල හරි, කෙහෙල් කොලේක දාල ඇද කොටු කපල හරි ගන්නවටද අච්චුවේ හදල දෙන එව්වටද කැමති. එහෙමත් නැත්තං හූසල් බත් බෙරි වෙංට හැදුව දාට වාගේ නිකංම පිඟානට දාල දෙනවටද කැමති?"
"ඒ එක්කටවත් නෙවෙයි.. කිරිබත් දංකුඩ හූරල දෙන එව්වට අප්පච්චි."
"මං කියන්නෙ දංකුඩ නෙවෙයි කොලුවෝ.. හොඳ කිරිබත් ගැන."
"වැඩිය බෙරිවෙල නැතුව අච්චුවේ හැදුව එව්වා හොඳයි අප්පච්චි."
"ඇයි බෙරිවෙල තිබ්බම මොකද.."
"නිකං බත් බෙරිවෙල තියෙනකොට අප්පච්චි මට කියන්නේ ඔන්න අම්ම කිරිබත් හදල කියල. ඒ කියන්නේ බෙරි වෙච්ච බත් කැමති නෑ කියන එකනෙ. කිරිබත් වුනත් මැටි අනල වාගේ බෙරි වුනාම වැඩිය කැමති නෑ අප්පච්චි."
"හ්ම්.. හොඳයි.. ඒකත් මතක තියා ගංටකො. අඹ... ගෙඩිය පිටිං කනකොටයි කපල කනකොටයි රස ටිකක් වෙනස් නේද.. "
"ඔව් අප්පච්චි... ගෙඩිය පිටිං කංට මං ආසා."
"අන්න ඒ වාගේ එකක් මෙතනත් වෙනවා..
කිරිබත් ටික හුඟක් බෙරි වෙංට නොදී බා ගෙන ටිකක් රස්නේ පිටිංම ගන්නවා. කලිංම හදාගෙන හිටිය පැණිපොල් ටිකත් ගන්නවා. ඔය පෝප්පතක් ඕනෑ තරම දිග පලලට කපා ගන්නවා. ඉතුරු කර ගත්ත දිය කිරි ටිකක් ඒකේ ගා ගන්නවා. නැත්තං බත් ඒකේ ඇලෙනවා. දැං අර කිරිබත් ටිකක් හැන්දකිං ඒ පෝප්පතට දාල වඩනවා. පැණිපොල් ටිකක් ඊට උඩිං දාල එව්වා වැහෙංට කිරිබත් ඒ උඩට පෙරලෙංට පෝප්පත රවුම් කරනවා. දැන් කොං දෙකෙං අල්ලල දෙපැත්තට කරකවනවා.. හොඳ..ට තද වෙංට. එතකොට කොට්ට කිරිබත් ගෙඩිය කොට්ට ගෙඩිය වාගේ හැදෙනවා. එච්චරයි. දිගෑරල ගන්නවා. ඉතිං තද වුන කිරිබත් ගෙඩිය අතිං කඩ කඩ ඇන්න කනකොට නිකං කිරිබතුයි පැණි පොලුයි කනවට වැඩිය රහයි."
"හ්ම්.."
"බත් කුරුල්ලා වුනත්... නිකං කිරිබත්, අච්චුවේ හැදුවා වුනත් කොට්ට කිරිබත් පොප්පතේ මිරිකල ගත්තම වුනත් රස වෙනස් වෙන්නේ ඔන්න ඔය විදියට ගල් වෙංට මිරිකල ගන්න හින්දා."
"ඉතිං අප්පච්චි පෝප්පතක් හොයා ගංට බැරි වුනොත්...?"
"ඔය වෙන කොල ජාතිවල තදවෙංට මිරිකංට බෑ. එව්වා ඉරෙනවා. ඉතිං එහෙම වෙලාවටත් කිරිබත් අච්චූවේ දිය කිරි ගාල ඇන්න, කිරිබත් තට්ටුවක් දානවා.. ඊට පස්සේ පැණිපොල් තුනී තට්ටුවක් දානව.. ආයෙම කිරිබත් තට්ටුවක් දාල හොඳට මිරිකල ගන්නවා."
"අප්පච්චී.... අච්චුවේ මිරිකනකොට අනික් පැත්තෙං එලියට එනවනෙ.."
"නෑ.. නෑ.. කට පලල බේසමක්, ලෑල්ලක් වාගේ එකක තියල මිරිකා ගංට පුලුවන්නෙ. පස්සේ අච්චුව ටික ටික උස්සල මිරිකල කිරිබත් කැටේ එලියට ගන්නවා."
"අපෙඅම්මා.. දවසක් කිව්වේ හෙම්බිරිස්සාව තියෙනකොට.."
"ඔව් ඔව්.. හෙම්බිරිස්සාව තියෙනකොට කිරිබත් අගුණයි. මයෙ පුතාට නොදී කංට බැරි හිංදා අපි හදන්නෙත් නෑ."
"අප්පච්චි... පොල් ගාල රැල් කනකොටයි, බෑයෙංම උලා කනකොටයි ඒත් රහ වෙනස් නේද?"
"අම්මා.. මෙන්න පොල් බෑය උලාකාල තියෙන ලේනා.. අහුවුනා....!"
simple "s"
2018.09.30
No comments:
Post a Comment